د افغانستان او ترکمنستان پر ګډه پوله د ا.ا.ا د صنعت او سوداګرۍ وزارت د سوداگرۍ چارو مرستیال مولوي احمد الله زاهدپه ګډون د افغانستان د اسلامي امارت د کابینې یوه لوړ پوړي پلاوي د ترکمنستان جمهوریت د کابینې له یو شمېر غړیو سره وکتل
چهارشنبه ۱۷ صفرالمظفر ۱۴۴۶ / ۳۱ زمری ۱۴۰۳
د راپور پر بنسټ، پدې کتنه کې ا.ا.ا. د بهرنيو چارو وزير محترم مولوي امير خان متقي په مشرۍ ترسره شوه د کانونو او پټرولیم وزارت مرستیال وزیر محترم مولوي احمدالله زاهد، د هرات والي او نورو چارواکو له افغان لوري څخه گډون درلود چې د ترکمنستان د پلاوي مشري د ترکمنستان د وزيرانو شورا مرستيال او د بهرنيو چارو وزير ښاغلي رشيد مردوف کوله او د هغه هېواد د وزيرانو شورا مرستيالانو او کابينې غړیو او نورو لوړپوړو چاروکو پکې گډون درلود.
دواړو پلاویو په تورغنډۍ کې د وسپنې پټلۍ له سټېشن، د ټاپي نلليکې او د برېښنا له لویو پروژو څخه د گډې پولې دواړو غاړي ته ليدنه وکړه او د ټاپي نلليکې د کار عملي پيل لپاره يې د دواړو خواوو چمتووالي و ارزول.
د افغانستان د اسلامي امارت د بهرنيو چارو وزير د ترکمنستان د بهرنيو چارو وزير ته ډاډ ورکړ چې د افغانستان حکومت اړونده ارگانونه د افغانستان په خاوره کې د ټاپي نلليکې د غځولو لپاره خپل چمتووالی لري او تيار دي چې عملي کار پيل شي.
محترم مولوي امير خان متقي همداراز وويل چې افغانستان د تورغنډۍ وسپنې پټلۍ د سټېشن او همدارنگه د نلليکې د غځولو په برخو کې د ترکمنستان د پانگونې هرکلی کوي او ویې ویل چې دغه اقدامات به د دواړو هېوادونو او په ټوله کې د سيمې اقتصاد وغوړوي.
په یاده دوه اړخیزه ناسته کې د ا.ا.د صنعت او سوداګرۍ وزارت مرستیال مولوي احمد الله زاهد هم په خپل وار له ترکمنستان جمهوریت سره د افغانستان د سوداګریزو اړیکو پر پراختیا خوښې څرګنده کړه او په افغان خاوره کې یې د ترکمنستان سوداګریزو پلاویو ته د هر ډول آسانتیاوو د برابرولو په اړه ډاډ ورکړ.
همدارنګه د ترکمنستان د بهرنيو چارو وزير د دې لیدنې پرمهال د ترکمنستان په خاوره کې د ټاپي نلليکې د عملي چارو د پيل لپاره د خپل هېواد د تيارۍ په اړه افغان لوري ته ډاډ ورکړ.
ښاغلي رشيد مردوف وويل، چې هېواد يې بشپړه ژمنتيا لري چې ډېر ژر به د افغانستان په خاوره کې د ټاپي پروژې د عملي چارو د پيل ترڅنگ د وسپنې پټلۍ او سټېشن د رغولو چارې هم پيل شي او د نورالجهاد دبرق سبسټېشن به هم گټه اخيستلو ته وسپارل شي.
