په خوست ولایت کې د اپټا تړون د تعدیل په اړه مشورتي ناسته
چهارشنبه: د چنګاښ ۲مه ۱۴۰۰
د افغانستان - پاکستان ترمنځ د ټرانزیټي او سوداګریز تړون (اپټا) د تعدیل په اړه مشورتي ناسته،د صنعت او سوداګرۍ وزارت د مرستیال ښاغلي محمد سلیمان بن شاه،د خوست والي او د هیواد سویل ختیځ ولایاتو دخصوصي سکتوراستازو په ګډون په انلاین ډول ترسره شوه.
د غونډې په پیل کې دصنعت او سوداګریزوچارومرستیال ښاغلي محمد سلیمان بن شاه وویل چې دغه وزارت دولسمشرۍ د مقام په ملاتړ سره د افغانستان - پاکستان ترمنځ د ترانزیتې او سوداګریز تړون (اپټا) د تعدیل په هکله دخصوصي سکتور سره په مشوره بوخت دی او د صنعت او سوداګرۍ وزارت لپاره د خصوصي سکتور نظریات او مشوره خورا مهمه ده چې په دې سره به د دواړو هیوادونو او سیمې ترمینځ د ترانزیت - سوداګرۍ نوی فصل پرانستل شي چې دا د افغانستان د ترانزیت او سوداګرۍ لپاره به خورا ګټوره پایله ولري.
په دې ناسته کې د خوست والي، د خصوصي سکتور استازو او د دې وزارت رئیسانو هم د صنعت او سوداګرۍ وزارت په مشرۍ د اپټا تړون کې د تعدیلاتو پرمختګ په اړه خپل نظریات او وړاندیزونه شریک کړل.
د صنعت او سوداګرۍ وزارت تر دې وړاندې په کندهار او ننګرهار ولایاتو کې هم د خصوصي سکتور له استازو سره غونډې نیولي وي، چې نږدې راتلونکي کې به دهرات او بلخ ولایتونو دخصوصي سکتور له استازو سره هم ورته ناستې ترسره شي.
دا مهال د صنعت او سوداګرۍ وزارت تخنیکي ډله د جمهوری ریاست د حقوقي واحد په همکارۍ د پاکستان د سوداګرۍ وزارت دتخنیکي ډلې سره د اپټا تړون د تعدیل په هکله په خبرو بوخت دی.
