د صنعت او سوداګرۍ وزارت مرستيال وزير مولوي قدرت الله جمال د صنعت اونۍ او نړيوال نندارتون دپرانېست غونډې په مراسمو کې وینا وکړه
یکشنبه ۳ ذوالقعدة الحرام۱۴۴۵ / ۲۳ غویی ۱۴۰۳
یاده غونډه کې دریاست الوزراء اداري مرستیال مولوي عبدالسلام حنفي، د زراعت وزارت مرستیال مولوي صدراعظم، دافغانستان بانک رئیس مولوي هدایت الله بدري او همداراز دامارت لوړ پوړو چارواکو او خارجي دیپلوماتانو ګډون درلود.
ښاغلي جمال میلمنو ته ښه راغلاست وويل او زیاته یې کړه چې د افغانستان د ا سلامي امارت له بریا وروسته زموږ صنعت د کیفيت له مخې بیسارې وده کړې ده .
په یاد نندارتون کې د هیواد له مختلفو ولايتونو څخه څه دپاسه په ۴۵۰ غرفو کې خپل توليدات او محصولات نندارې ته وړاندې شوي دي.
ښاغلي جمال وویل یاد نندارتون چې یوه اونۍ به دوام وکړي په بیلابیلو برخو کې توليدات لکه غالۍ ، مرمرنې ډبرې ، لبنيات غيرې الکولي مشروبات ، اوسپنه ، تعميراتي مواد ، تعميراتي رنګونه ، خوراکي توکي ، بطرۍ ، ايس کريم ، کيک او بسکټ ، چاپي مواد ، موټر سايکلونه ، بريښنايي موټرونه او داسې نور سلګونه قلمه اجناس او توکي نندارې ته وړاندې شوي دي.
په پای کې ښاغلي جمال له خپلو هيوادوالو وغوښتل چې له دغه نندارتون څخه ليدنه وکړي او د کورنيو توليداتو په ترویج سره خپل وطني صنعت او تولیداتو ته وده ورکړي.
