د صنعت او سوداګرۍ مرستیال وزیر له یو شمېر صنعتکارانو سره ولیدل
سهشنبه۹ شعبان المعظم۱۴۴۵/ ۱ کب ۱۴۰۲
د صنعت او سوداګرۍ وزارت مرستيال وزیر ښاغلي مولوي قدرت الله جمال له يو شمېر صنعتکارانو او سوداګرو سره په خپل کاري دفتر کې ولیدل.
د ناستې ګډونوالو هیله څرګنده کړه چې په بهرنيو توليداتو د تعرفې اړوند او په داخل او بهر کې افغاني توليداتو ته بازار موندنه کې د افغانستان اسلامي امارت ورسره لا ډېره همکاري وکړي.
د دوی په خبره په دې ډول سره به وتوانېږي چې افغان صنعتکاران او په ټوله کې افغانستان په صنعتي برخه کې د ځان بساینې په لور ګامونه واخلي.
ښاغلي جمال ورسره د هر راز مرستې او همکارۍ تر څنګ افغاني توليداتو ته په داخل او خارج کې د بازار موندنې ډاډ ورکړ.
نوموړي له صنعتکارانو وغوښتل چې د خپلو تولیداتو په معیاري کېدو لا هڅه وکړي، چې له خارجي توليداتو سره په بازار کې سيالي وکړای شي.
