د خصوصي سکتور له خوا د کابل په ده سبز لسوالۍ کې د صنعتي پارک له جوړښت سره لیوالتیا
یکشنبه 8 شوال المکرم 1446 / 17 حمل 1404
د ا.ا.ا د صنعت او سوداګرۍ وزارت سرپرست محترم الحاج نورالدین عزیزي نن تر غرمې وروسته د هېواد له ملي او نړیوال سوداګر محترم الحاج خلیل ځدران، د پلچرخي د صنعتي پارک د صنعت کارانو اتحادیې له رییس محترم الحاج عبدالجبار صافي او ملي سوداګر محترم بختاور کوچي سره لیدنه ترسره کړه.
پدې لیدنه کې دغه کسانو د کابل ولایت په ده سبز ولسوالۍ کې د ۱۲ میلیون ډالرو په پانګونې او د زر جریبه ځمکې په مساحت سره د یوه خصوصي صنعتي پارک د جوړښت په اړه خپل پلان او د هر چا د پانګونې کچه د صنعت او سوداګرۍ وزارت له مشرتابه سره شریک کړل او ټینګار یې وکړ چې د دغه صنعتي پارک په جوړیدو او فعالیدو سره به سل ګونو صنعت کارانو ته د فعالیت او زرګونو تنو نورو ته د کار زمینه برابره شي.
د صنعت او سوداګرۍ وزارت سرپرست محترم الحاج نورالدین عزیزي د دغه پانګوالو له پروګرام څخه د هرکلي په ترڅ کې له هغوی وغوښتل چې د دغه صنعتي پارک طرحه او پروپوزل د صنعت او سوداګرۍ وزارت سره شریک کړي تر څو تخنیکي ټیم پرې کار وکړي.
