دهېواد دمحصولاتو لپاره به په جدي ډول بازار موندنه تر سره شي
شنبه: دکب ۲مه ۱۳۹۹
دصنعت او سوداګرۍ وزیر ښاغلي نثار احمد غوریاني په بهر هېوادونو کې ددغه وزارت له میشتو اتشو سره دیوه ویډیو کنفرانس له لارې وویل چې دنړۍ او سیمې په هېوادونو کې د افغاني محصولاتو لپاره به په بازارموندنه جدي کار تر سره شي.
ښاغلي غوریاني له سوداګریزو اتشو څخه غوښتنه وکړه چې په هر هېواد کې دنده تر سره کوي باید دافغاني محصولاتو لپاره بازار موندنه وکړي، تر څو په راتلونکي کال کې دافغاني صادراتو کچه لوړه شي.
په دغه ویډیویي کنفرانس کې په بهرنیو هیودانو کې میشتو اتشو ته دبازارموندنې تګلاره هم معرفي شوه او ښاغلي غوریاني یې پر پلي کیدو ټینګار وکړ.
دیادونې وړ ده چې دصنعت او سوداګرۍ وزارت دسیمې او نړۍ په هېوادونو کې سوداګریزې اتشې ګمارلي او دهغوی دنده داده چې دتولیدي محصولاتو لپاره بازار موندنه وکړي او تر څنګ یې دپانګونې پر راجلبولو کې هم فعالیت تر سره کړي.
