دفعالیت دجوازونو دویش په برخه کې د غوره خدمتونو پر وړاندې کولو دصنعت او سوداګرۍ معین ټینګار
یکشنبه د غبرګولي ۲یمه ۱۴۰۰
د صنعت او سوداګرۍ وزارت معین محمد سلیمان بن شاه ، چې د صنعتکارانو ، سوداګرو او پانګوالو پر وړاندې د شته فرصتونو او ننګونو د څیړنې په موخه کندهار ولایت ته تللی ، ددغه ولایت دصنعت او سوداګرۍ ریاست دجوازونو دویش له مرکز څخه لیدنه وکړه او په دغه ولایت کې یې دجوازونو دویش په برخه کې داسانتیاوو په رامنځته کېدو ټینګار وکړ
د صنعت او سوداګرۍ وزارت معین وویل چې په مرکز او ولایتونو کې د جواز ورکولو د توزیع مرکز د جوړولو موخه د خصوصي سکتور لپاره لازمي اسانتیاوې برابرول او دوی ته د غوره خدمات وړاندې کول دي.
ښاغلي بن شاه همدارنګه زیاته کړه چې د صنعت او سوداګرۍ وزارت خصوصي سکتور ته د منظمو خدمتونو د وړاندې کولو په موخه د هیواد په ټولو ولایتونو په ځانګړي ډول د اقتصادي ، سوداګریزو او ترانزیټي زونونو په مرکزونو کې د جواز د ویش مرکزونه جوړوي.
دیادونې وړ ده چې کندهار ولایت د صنعت او سوداګرۍ وزارت لپاره د خپلو صنعتي ، اقتصادي ، سوداګریزو او ترانزیټي فعالیتونو له امله د هیواد داقتصادي او صنعتي ودې لپاره ځانګړی ځای لري.
