دامید پروژې (OMAID) انلاین غونډه تر سره شوه
سه شنبه: دسلواغې ۲۸مه ۱۳۹۹
دامید پروژې (OMAID) انلاین غونډه دصنعت او سوداګرۍ وزارت وزیر ښاغلي نثار احمد غوریاني، ددې وزارت تخنیکي ټیم، دمالیې ، کرنې او مالدارۍ وزارت چارواکو او په افغانستان کې دنړیوال بانک مسولینو په ګډون ترسره شوه.
په دې ناسته کې د صنعت او سوداګرۍ وزیر نثار احمد غوریاني د نړیوال بانک د دوامداره همکاري او د آمید پروژې تمویل وستایه او د دې همکاریو پر دوام یې ټینګار وکړ.
ښاغلي غوریاني دا هم وویل چې د صنعتي پارکونو جوړول د افغانستان په اقتصادي وده او پرمختګ کې ستر رول لوبولی او د امید پروژه چې په هیواد کې د یو لړ صنعتي - کرهنیزو پارکونو د جوړولو مسولیت لري دصنعت او سوداګرۍ وزارت لپاره داهمیت وړ پروژه ده.
د امید پروژی پرمختیایی موخه د هیواد په بیلابیلو ولایتونو کې د بزګرانو په ګډون د خصوصي سکتور د برخې اخیستنې په زیاتوالي سره د کرنې سوداګرۍ پراختیا لپاره د مناسب چاپیریال رامینځته کول په ګوته شوي دي.
په دې ناسته کې د صنعت او سوداګرۍ ، مالیې ، کرنې ، اوبو لګونې او مالدارۍ وزارتونو او د نړیوال بانک ترمنځ د همغږۍ په اړه خبرې اترې وشوې چې څنګه کولای شي د دې پروژې د پلي کولو څرنګوالی وڅیړي.
