د څارویو د صادراتو په اړه غونډه
یکشنبه،د غویي۴مه ۱۴۰۱
د صنعت او سوداګرۍ وزارت د مرستیال ښاغلي مولوی قدرت الله جمال په مشرۍ د څارویو په ځانګړې توګه د پسونو د صادراتو په اړه بحث او خبرې اترې وشوې.
په دې غونډه کې د صنعت او سوداګرۍ وزارت د لومړنیو صنایعو رئیس ،د صادراتو د پراختیا رئیس، د کرنې، اوبولګولو او مالدارۍ وزارت استازو، د کرنې او مالدارۍ د خونې استازو، دقصابانو اتحادیې او د څارویو د صادراتو د ادارې استازو ګډون درلود.
ګډونوالو د هیواد د قوانینواو د دولت د شرایطو،عوایدو او د خلکو ګټو ته په پام سره سم تخنیکي بحثونه وکړل او خپل نظریات يې شریک کړل.
د غونډې په پای کې د صنعت او سوداګرۍ وزارت مرستیال ښاغلي مولوي قدرت الله جمال د ګډون والو د نظریاتو او بحثونو څخه وروسته پرېکړه وکړه چې د څارویو په ځانګړې توګه د پسونو صادرات منع کړل او ويې ویل چې هیڅوک د څارویو په ځانګړې ډول د پسونو د صادراتو اجازه نلري.
همدارنګه نوموړي د دغه وزارت د لومړنيو صنايعو رئيس ته لارښوونه وکړه، چې د څارویو د قاچاق د مخنيوي په موخه دې امنيتي ارګانونو ته ليکلي مکتوب ولېږي.
د يادونې وړ ده، چې دغه غونډه د هېواد د يو تن سوداګر د غوښتنليک پر بنسټ جوړه شوې وه، چې په کې يې یوګاونډي هېواد ته د دوه زره پسونو د صادرولو د اجازې غوښتنه کړې وه.
