د افغانستان په صادراتو کې دېرش سلنه زیاتوالی
چهارشنبه : زمری ۱۳مه ۱۴۰۰
د روان مالي کال په لومړیو شپږو میاشتو کې د افغانستان په صادراتو کې دېرش سلنه زیاتوالی راغلی دی.
د صنعت او سوداګرۍ وزیر ښاغلي نثار احمد غوریاني چې د افغانستان د ممیزو ، میوو ، سبزیجاتو او نباتاتو د صادراتو پراختیا ادارې د مشرتابه بورډ کلنۍ غونډه کې يې برخه اخیستې وه وویل چې د۱۴۰۰ مالي کال په لومړیو شپږو میاشتو کې د نړۍ اوسیمې بیلابیلو هیوادونو ته دافغانستان صادراتو کې ۳۰ سلنه زیاتوالی راغلي دی .
ښاغلي غورياني زیاته کړه چې دی وزارت د مالیې وزارت په همکارۍ د ننګرهار ، کندهار او هرات ولایتونو په ګمرکونو کې صادراتي اسنادو پروسې د بهیر واحد مرکزونه پرانیستي او په نږدې راتلونکي کې به په دوه نور ولایتونو کې هم ورته مرکزونه پرانیزي.
د صنعت او سوداګرۍ وزیر د ممیز ، میوو ، سبزیجاتو او درملو بوټو د صادراتو د پراختیا اداري ته د نړیوال معیارورنو اعتبارلیک ترلاسه کولو له امله مبارکي وویله ، زیاته يې کړه چې سږکال د افغانستان ډیری صادرات وچې میوې او زعفران جوړوی،او هم د صنعت او سوداګرۍ وزارت سږکال دسیمې او نړۍ له بیلابیلو هیوادونو سره تړونونه لاسلیک کړي ترڅو د افغانستان د صادراتو د زیاتولو لپاره اړینې اسانتیاوې برابرې کړي.
همدا رازد ولسمشرۍ ماڼۍ د لارښونو او د صنعت او سوداګرۍ وزارت د مقام ټینګار پربنسټ ددې وزارت سوداګریزو استازو د کورنیو تولیداتو بازار موندنې او د سیمې او نړۍ هیوادونو سره سوداګرۍ ښه کولو لپاره خپلې هڅې دوه چنده کړي.
له بلې خوا په پام کې ده چې په راتلونکو اونیو کې ، د دوبۍ اکسپو 2020 نړیوال نندارتو د متحده عربي اماراتو دوبۍ ښار کې د شپږو میاشتو لپاره ترسره شي،چې د صنعت او سوداګرۍ وزارت په یاد نندارتون کې د ګډون په موخه د افغانستان د تولیدي او صادراتي شرکتونو لپاره اړینې اسانتیاوی رامنځته کړی دی.
په دې غونډه دافغانستان د ممیزو ، میوو ، سبزیجاتو او نباتاتو د صادراتو پراختیا ادارۍ مشر سید عظیم مصطفی هاشمي وویل چې د دوی اداره اوس د افغانستان صادراتي محصولاتو په ځانګړي ډول وچو میوو ، سبزیجاتو او درملو بوټو لپاره څو ډوله نړیوالو معیارونوسره سم اعتبار لیکونه د نړیوال سازمان په تائید سره ترلاسه کړی دي.
