د افغانستان د بریا او اقتصادي پرمختګ نندارتون پرانیستل شو
پنجشنبه ۱۸ صفرالمظفر ۱۴۴۶ / ۱ وږی ۱۴۰۳
"د افغانستان د بریا او اقتصادي پرمختګ" تر سرلیک لاندې ملي نندارتون نن پنجشنبه د سنبلې په لومړۍ نېټه د افغانستان د نندارتونونو په نړیوال مرکز کې د اسلامي امارت د صنعت او سودارګرۍ وزارت او خصوصي سکتور د استازو په حضور کې پرانیستل شو.
پدې نندارتون کې د هېواد د لوړ کیفیت درلودونکي تولیدات او محصولات چې په بېلابېلو سکتورونو پورې اړه لري، په ۳۱۰ غرفو کې د څلورو ورځو لپاره نندارې ته اېښودل شوي دي.
په هغه غونډه کې چې په همدې مناسبت جوړه شوې وه د صنعت او سوداګرۍ وزارت په استازیتوب محترم مولوي دین پرور د سوداګرۍ چارو عمومي رییس، خپلو هېواد والو ته د ملي تولیداتو او محصولاتو د ور پېژندنې لپاره د دې ډول نندارتونونو جوړیدل،اړین وګڼل.
هغه زیاته کړه چې افغاني تولیدتو اوس په نړۍ کې خپل ځای پیدا کړی او د نړۍ سترو هېوادو ته افغاني محصولات صادرېږي. همدارنګه ښاغلي دین پرور له ټولو پانګوالو او سوداګرو وغوښتل ترڅو په خپل هېواد کې پانګونه وکړيٍ.
تر هغه وروسته د افغانستان د سوداګرۍ او پانګونې د خونې لومړي مرستیال حترم محمدیونس مهمند،
پدې ټکي له ټېنګار سره چې د نندارتون په ټولو غرفو کې د افغانستان محصولات او تولیدات نندارې ته اېښودل شوي دي وویل :د افغانستان د اسلامي امارت په ملاتړ سره مو صادرات زیات شوي او واردات مو کم شوي دي.
وروسته بیا د افغانستان د زراعت او مالدارۍ د خونې رییس خانمحمد فروتن وویل چې د خپلو تولیداتو او محصولاتو لپاره د بازار موندنې په موخه د نندارتونو جوړول یو اصل دی. نوموړي افغانستان یو زراعتي ملک وګاڼه او له ټولو خلکو یې وغوښټل ترڅو له خپل داخلي تولیداتو ګټه پږرته کړي.
همدارنګه ښاغلي سخي احمد پیمان د افغانستان د صنایعو او کانونو خونې لومړي مرستیال، د یادې خونې په استازیتوب وویل چې: زمونږ مسوولیت با کیفیته تولیدات او د حکومت مسوولیت له کورنیو تولیداتو ملاتړ کول او د خلکو مسوولیت له دغه کورنیو تولیداتو ګټه اخیستل او استعمال دی.
