کندهار ولايت ته د صنعت او سوداګرۍ وزارت د معین سفر
پنجشنبه14 محرم الحرام 1447 / 19 چنګاښ 1404
د صنعت او سوداګرۍ وزارت معین ښاغلی مولوي احمدالله زاهد د خپل سفر په ترڅ کې د کندهار ولایت د سوداګرۍ او پانګونې؛ د صنایعو او کانونو خونو له مسئولینو، مدیره پلاوي، ملي سوداګرو، پانګوالو او صنعتکارانو سره وکتل.
د غونډې پر مهال ګډونوالو د صنعتي ځمکو د وېش، د اړینو خدماتو نشتوالی، په خامو توکو د ترجیحي تعرفې اړتیا، د پاکستاني لوري سره د تازه مېوې د سوداګريزې هوکړې او د سوداګرۍ پر وړاندې د شته خنډونو په اړه خپلې اندېښنې، وړاندیزونه او غوښتنې شریکې کړې.
ښاغلي زاهد یادو اندېښنو ته په ځواب کې څرګنده کړه چې د صنعتي پارکونو د ځمکو وېش به شفاف، عادلانه، او د امیرالمؤمنین حفظهالله له لورې د تصویب شوي قانون پر بنسټ ترسره کېږي. نوموړي وویل، هغو وارداتي توکو ته به تعرفه لوړېږي چې کورنی توليد یې تر ۲۰ سلنې یا زیات د بازار اړتیا پوره کولی شي.
هغه زیاته کړه چې د تعرفو اړوند اسناد به له دې وروسته د الکترونیکي سیسټم له لارې، په شفاف، دقیق او چټک ډول طی مراحل کېږي او وزارت هڅه کوي چې دا بهیر په نورو برخو کې هم پراخ کړي، د دې ترڅنګ د پاکستان سره د ترجيحي تعرفو په اړه پانګوالو او ملي سوداګرو ته ډاډ ورکړل شو.
ښاغلي معين صاحب د خپلو خبرو په ترڅ کې وویل، ځینې هېوادونه د نفتو، ځینې د کانونو او ځینې د صنعت له لارې پرمختګ کری؛ خو افغانستان له نېکه مرغه له درې واړو سرچینو برخمن دی. نوموړي پانګوال وهڅول، ترڅو له دغو طبیعي او اقتصادي فرصتونو اعظمي ګټه واخلي او د هېواد د اقتصادي ودې لپاره رغنده ګامونه پورته کړي.
