د ازبکستان هیواد لوړپوړی سوداګریز پلاوی افغانستان ته راورسېده
شنبه مورخ 9صفرالمظفر ۱۴۴۵ / ۴ وږی ۱۴۰۲
د ازبکستان هیواد دیرش کسیز لوړپوړی سوداګریز پلاوی نن شنبه غرمه مهال کابل د دوه ورځني سفر په موخه کابل ته راورسېده. د پلاوي مشري د ازبکستان د سوداګرۍ او صنعت وزارت لومړی معاون ښاغلی ناظم جان خالمرادوف کوي.
د سوداګرۍ وزارت مرستیال ښاغلي مولوي قدرت جمال یاد پلاوي ته د کابل په نړیوال هوايی ډګر کې ښه راغلاست ووایه. یاد سفر د دواړو هیوادونو د سوداګریزو اړیکو د پیاوړتیا او پراختیا له پاره له ارزښت ډک بلل کیږي. ازبکستان د برېښنا, ټیکنالوجي او خوراکي موادو په برخه کې د همکارۍ لېوالتیا ښودلې چې ددې دوه ورځني سفر په اوږدو کې به پرې هر اړخیزه خبرې اترې وشي. په پام کې ده چې د دواړو هیوادنو حکومتي اود خصوصي سکتورونو سوداګریز استازي یو لړ خپلمنځي ناستې ترسره کړي او د سوداګریزو اړیکو څرنګوالی او پرمختګ وارزوي.
